Art and Crafts
ಕಲೆ ಮತ್ತು ಕರಕುಶಲ
Poetry
ಕವನ
Literature
ಸಾಹಿತ್ಯ
Travel Journal
ಪ್ರವಾಸ ಪತ್ರಿಕೆ
Theatre and Drama
ರಂಗಭೂಮಿ ಮತ್ತು ನಾಟಕ
Home » Default Category (ಪೂರ್ವ ನಿಯೋಜಿತ ವರ್ಗ) 0

ವಿದಾಯ…..

Submitted by divakara dongre m divakara dongre m on February 18, 2016 – 5:13 am One Comment

ಶಿಶಿರನಪ್ಪುಗೆಯಲ್ಲಿ
ನಲುಗಿ
ನಭದೆಡೆಗೆ
ಕೈಚಾಚಿದ್ದೆ
ದ್ರುಪದೆಯಂತೆ.

ನಾನು ಪ್ರಕೃತಿ
ಸೃಷ್ಟಿಗನುಕೂಲೆ.
ಬತ್ತಲಾಗುವುದು
ನನ್ನ ಋತುಧರ್ಮ
ಸಹಜವದೆನಗೆ.

ಸುತ್ತ ಕೋಗಿಲೆಯ
ಕೂಜನ, ಕಣ್ತೆರೆದೆ
ನಾಚಿ ನೀರಾದೆ.
ನೀನು ಹೊದಿಸಿದ್ದೆ
ಹಸಿರ ಪತ್ತಲ ಮೈತುಂಬ.

ಮೊಗ್ಗಾಗಿದ್ದವಳು
ಅರಳಬೇಕೆಂಬ ತವಕ
ಮೈಯ್ಯಲ್ಲೇನೋ ಪುಳಕ,
ಕಂಡದ್ದು ಕನಸಲ್ಲ
ನಾನು ಪುಷ್ಪವತಿ.

ಗಂಧ ಸುಗಂಧ
ಎದೆ ತುಂಬ ಆಸೆ
ಕಾಮನಬಿಲ್ಲು.
ಮುಂದೆ ಮಾತಿಲ್ಲ
ನನ್ನ ನಿನ್ನ ಮಿಲನ.

ರಂಗೇರಿದ್ದೇನೆ
ನಾಚಿ ನೀರಾಗಿದ್ದೇನೆ.
ನಿನ್ನಂಗ ಸಂಗದಲಿ
ಕಳೆದ ದಿನಗಳ ಲೆಕ್ಕವಿದೆ
ನನ್ನ ಬಳಿಯಲ್ಲಿ.

ನಾನು ಋತು ವಲ್ಲಭೆ
ದ್ರುಪದೆಯನ್ನೂ
ಮೀರಿ ನಿಂತವಳು.
ಪ್ರತಿ ಸಲವು ತವಕ
ನವ ರೂಪ, ಅನುಭವ.

ಬಾ ಗೆಳೆಯ ಹತ್ತಿರ,
ಭಾರವಾಗಿದೆ ಮೈಮನ.
ವಿದಾಯದ ಮೊದಲು
ಪಿಸು ಮಾತೊಂದಿದೆ
ನಾನೀಗ ಫಲವತಿ.

-ದಿವಾಕರ ಡೋಂಗ್ರೆ ಎಂ.

One Comment »

Leave a comment